Mi uvijek prednost dajemo onim receptima koji će naravno probuditi sva naša čula, ali isto tako i zbog kojh nećemo morati da provedemo čitavu vječnost pored šporeta.

punjene tikvice.jpg

Danas je na red došlo preukusno slano jelo od tikvica - čijem početku sezone se posebno radujemo, i to u kombinaciji sa kremastim punjenjem od mljevenog mesa.

Saznajte kako da napravite punjene tikvice sa mesom zapečene u rerni.

Potrebni sastojci:

5 tikvica srednje veličine - duguljastih

Pola kilograma mljevenog junećeg mesa

Pola litra pavlake za kuvanje

200 g trapist sira

1 veća glavica crnog luka

1 čen bijelog luka

So i biber

Sitno sjeckani list peršuna

Ulje.


Uputstvo za pripremu:

Očistite crni i bijeli luk, pa da ga potom što sitnije isjeckate. Nemojte miješati crni i bijeli luk.

Potom stavite u šerpu za dinstanje malo ulja, zagrijte, pa smanjite vatru, i dodajte sitno isjeckani crni luk. Sve to dobro izdinstajte dok luk ne dobije staklastu strukturu, dodajte bijeli luk (njega stavljate kasnije kako ne bi zagorio), a onda dodajte i meso.

Sve dobro izmješajte, začinite solju i i biberom, pa dinstajte 10-ak minuta dok meso ne promijeni boju. U izdinstano meso sipajte 250 ml pavlake za kuvanje, dobro promiješajte i ostavite na isključenoj ringli još minut. Na kraju je ostalo da u smjesu za punjenje ubacite i sjeckani peršun.

Tikvice dobro operite, ali ih nemojte ljuštiti. Presjecite na pola uzduž, pa ih pomoću male kašike izdubite sve dok ne uklonite mekanu sredinu sa semenkama. 

Potom uzmite veći pleh - jer ćete imati 10 komada punjenih tikvica, pa ih poređajte na papir za pečenje. Ravnomjerno rasporedite smjesu u tikvice. 

Trapist naribajte, pa ga pospite po napunjenim tikvicama, pa sve to prelijte ostatkom pavlake za kuvanje.

Stavite tikvice da se peku u rerni zagrijanoj na 200 stepeni oko 40-45 minuta.

Ostavite ih par minuta da se prohlade i spremne su za posluženje! Predlažemo da ih servirate uz svježu zelenu salatu ili rukolu.